Suche Erfahrungen: Genua mit dem Auto?

    Sali zäme


    Ich möchte in einer Woche mit meinem neuen Auto gerne nach Genua fahren. Dort würde das Hotel mir einen anscheinend sicheren Garagenplatz zur Verfügung stellen.
    Nichts desto trotz bin ich auf Grund diverser Geschichten bei Italien-Reisen mit dem Auto immer skeptisch. Hat jemand Erfahrungen? Und evtl. gleich noch in Genua. Muss ich Angst um mein Auto haben? Oder ist das alles nur übertrieben und bei weitem nicht tragisch?


    Besten Dank für Erfahrungen.


    Gruss
    Mario

    Me ghört scho ab und zue mal "Räubergschichte". Me mues sich eifach im klare sii dass immer öppis chan passiere. Wenn mer uffallt (z.B. miteme schöne, tüüre Auto) breichts eim sicher ehner als miteme normalo-Auto.


    In Bezug uf Genua und Italie allgemein hani scho vo folgende Stories ghört:
    - Helm ab em Töff klaut (isch abgschlosse gsi)
    - Uf de Autobahn Stei as Auto grüert demit mer meint es sig was kaputt und ahaltet. D Steiwerfer sind den wild gestikulierend verbi gfahre und händ welle dass mer ahaltet.... was wiiter passiert wär... ich weiss es ned.
    - Auto am Areisetag i d Hotelgarage gstellt und wo mer hei het welle isches nümm ume gsi.
    - Auto wo a de Stross a parkiert gsi isch "verrandaliert" (Schiibe und Lüchte igschlage, Dräck druf gschmisse etc.). Endergäbnis isch dete glaubs gsi dass en Garagist (de einzig i de Umgäbig) das Auto grad zumene tüüüüüfe Priis abkauft hätti, obwohl de Schade eigentlich gar ned so höch gsi wäri.... (Sauhund... sorry)


    Aber das sind sicher au eher Usnahme. Wenns der z schad um dis Auto isch, lueg halt dass mitme andere chasch goh wo ned uffallt. Aber wägem Auto ned oder wo anders i d Ferie... würdi ned mache.

    Naja... ich han die Gschichte ned miterläbt und vom ghöre säge lernt mer lüge. Ich weiss jo ned wie das genau glaufe isch...


    Aber wenn ich miteme uffällige und/oder tüüre Auto so neumed würd here goh, würdis halt eifach i de Garage loh, bisi wider hei gange und immer mol wider go luege öbs ume isch. Isch den Kacke wenn Hei willsch / muesch fahre und keis Auto me hesch.


    Bi mol mitem Kolleg und sim Vater nach Süditalie zu sinere Grossmueter. Isch irgend sones chlises Kaff i de nöchi vom Meer gsi. Mer händ de Renault 25 Baccara (vor meh als 10 Johr isch das no en Luxusvariante gsi) eifach i de Garage vom Onkel versteckt und nume ganz wenig füre gnoh. Ich mag mich no guet a die Blick erinnere wo d Lüüt druffe gha händ wo mer mit dere "Staatskarrosse" dete umegfahre sind. Aber isch halt au fern vo jeglichem Tourismus gsi. De absoluti Hammer isch de Tankwart am Rückreisetag gsi. De het öppe 5 mol nogfroget öb er s Auto würklich ganz voll dörfi tanke (süsch händs immer für ganz wenig tanked). Ich glaub de het nachher grad sini Tankstell für de Räscht vom Tag zue gmacht ;)

    Mir sind über t ostere in sanremo gsi... es hend alli wo hend chöne s display vom radio weggno und und und...... was mir aber eigentlich meh sorge gmacht het, isch das eifach 80% vo de autos verbület gsi sind.... sind mitenem AMG und 2 SAAB gange... i han müäse sege, zum glück stoht min golf i de schwiiz inere sichere tüüfgarage.... :zunge:

    guet ich bin mitem vorherige s3 au mal mits im Fürobig Verkehr vu Nizza gsi (umzingelt vu verbülte chärre) bin aber in ganzem Stuck wieder usecho :) mer muss halt eifach ufpasse und vorsichtig fahre. aber meh sorge macht mr di sach mitem diebstal.... ich han leider keis anders auto wo weniger würd uffalle ... s hotel isch es 4stärn und isch mits im stadtzentrum. wie sicher dere ihres parkhuus isch, weiss i halt au ned. uf jede fall sind mir det nur 2 täg, also s kontrolliere idr garage würd wohl wegfalle :)
    bin aber scho ziemli unsicher im moment. 3 mönet uf de charre gwartet und den grad weg würd mi andersch aschiesse...

    Sali KTS!


    Woni de Summer mitm Auto nach Sardinie gange bi, hani au in Genua iigschifft. Alles tip top, null Problem. :dh:


    Ufm Rückwäg bini dänn no vo Chivittavecchia id Provence gfahre und zGenua öppe e Schtund quer ide City umenandgchrüüzt. Au det e käi Problem gha. :)


    Wie bereits obe gschribe: Passiere cha immer was, aber grundsätzlich ischs save. Sich äifach immer vor- und umsichtig verhalte... :wh:


    Gruess,
    flyer83

    Es goht scho, bin mit mim chline Polo au scho zwei mal di ganz Côte d'Azur abgrädlet und schomal mit emene 5er BMW, jg '10 dürs Longedoc düüset.


    Han d'Autos immer in öffentliche Parkhüüser bzw. in gsicherte Hotelgarage abgstellt gha und isch bis jetzt immer guet gange *hebholz*.


    Was i eifach empfähle isch: uf gar kein Fall in Siite/Längsparkfälder de Charre stelle - au kei 5 Min. Will denn gits denn ebe die schöne schürf- und schubswunde rund ums Auto umä... ;) Läck du mir, mer händ da eim in Montpellier zueglueget, de isch ungloge 5x aagange bim usparkiere...

    danke für d erfahrige! also ich wirds genau id garage stelle, genua zwei täg aluege und denn wieder abhaue... vu dem her sets unproblematisch si.


    wägem parking het mr s hotel grad no zrug gschribe:


    About the parking, the hotel haven’t a garage but close to us there is a Garage the cost is 25€ for 24 hours, it close at midnight and open at 7 o clock.


    Und am schien a schaffed det en typ, wo seid wie mr iparkiere muss. also vu dem här isches glaubs rächt save.
    ha sogar a website gfunde: http://www.royalgarageautorimessagenova.com/index.html

    ciao a tutti ;))


    So nun wie es wirklich gsi isch :)


    D fahrt nach Genua isch absolut unproblematisch gsi, hend aber s auto au nie allei auf de raschtätte lo stoh.
    In Genua hani s auto (inkl. Schlüssel) id händ vu sonere Privatgarage (link schon obe erwähnt) gäh. Am nächschte Tag hani s auto wieder unversehrt gha :)
    Und au d heifahrt isch bis uf de hektisch italienisch verkehr eigentlich gar keis problem gsi.


    also i chan säge, Genua mit Auto null problemo. Und falls öper en Garage det brucht, söllr die nä wo i gha han. 2 Täg 31 Euro.


    Gruess